Haustönn hefst mánudaginn 12. september og hefst skráning í næstu viku. Allar upplýsingar varðandi námskeiðið verður að finna hér á síðunni í lok vikunnar.

Hlökkum til að hefja nýja dansönn!

Þar sem sólin fer hækkandi og sumarið er komið þá ætlar eldri danshópur skólans að halda Sumarfögnuð á mánudaginn kemur eða þann 13. júní kl.16.30-18.30 í World Class í Laugum. Það er spáð frábæru sólarveðri og ætlar danshópurinn að stilla upp svokallaðri WIPEOUT braut. Þetta er þrautabraut sem sameinar Skólahreysti braut, strandblakvöll, loftdýnur og trampólín. Danshópurinn mun einnig koma fram og sýna dansatriði auk þess að kenna SUMARDANSINN, en það er dans sem hópurinn hefur samið og ætlar að kenna nemendum. Dansinn verður svo tekinn upp á staðnum og deilt á heimasíðu og samfélagsmiðlum skólans.

Viðburðurinn er þáttur í fjáröflun danshópsins sem er á leið í æfingaferð í Póllandi í ágúst. Aðgangseyrir er 500 kr. Pylsur og drykkir verða síðan til sölu á staðnum á gjafaverði.

Við vonumst til að sjá sem flesta nemendur okkar mæta og fagna sumrinu með okkur. Vinir eru að sjálfsögðu velkomnir en skemmtunin er eingöngu ætluð börnum/unglingum á aldrinum 7-18 ára.

Hlökkum til að sjá ykkur 🙂

Á fimmtudaginn kemur, 5. maí, er Uppstigningardagur og falla því allir danstímar niður þann daginn. Enginn danstími mun fara fram samkvæmt stundaskrá.

Uppstigningardagur er almennur frídagur nemenda í skólum og þar af leiðandi fer kennsla ekki fram í dansskólanum.

Það gleður okkur að tilkynna að við munum stofna yngsta danshóp skólans á vornámskeiðinu í maí mánuði. Ástæðan er einföld. Þvílíkur uppgangur hefur verið í yngri danshópum skólans að undanförnu og það viljum við ýta undir. Danshópurinn er ætlaður nemendum á aldrinum 10-13 ára. Dansprufur munu fara fram laugardaginn 28. maí og verður það auglýst síðar.

Við erum ótrúlega stolt af nemendum okkar og erum ekkert smá stolt af því að geta ráðist í þetta verkefni með öllum þessum hæfileikabúntum.
Eingöngu nemendur sem eru skráðir á vornámskeið hafa kost á því að sækja dansprufurnar og freista þess að verða hluti af danshópnum.

Skráning er nú formlega hafin á vornámskeið skólans. Fer skráning fram hér á heimasíðu undir „skráning“ og í s.553 0000.  Allar upplýsingar er að finna hér að neðan.

VORNÁMSKEIÐ 2. MAÍ – 10. JÚNÍ
6 vikur með mismunandi kennurum.
Dansnám fyrir danshópa 7-9 ára, 10-12 ára, 13-15 ára, 16 plús og 20 plús.
Dansstílar : Jazz, Jazz Funk, Nútímadans, Lyrical, Módern og Commercial dansar.

Vornámskeið skólans hefst 2. maí. Við munum bjóða upp á markvisst og framsækið dansnám til þess að hámarka árangur nemenda. Nemendur geta sótt danstíma tvisvar eða þrisvar í viku. Nemendum stendur einnig til boða að sækja danstíma í fleiri en einum danshóp og geta sótt tíma allt að sjö sinnum í viku. Við finnum fyrir auknum áhuga og eftirspurn er mikil eftir auknum æfingatíma.

Skipulag námskeiðsins
Hver danshópur fær tvo kennara á meðan á námskeiðinu stendur. Hvor kennari tekur fyrir ákveðinn dansstíl sem hann sérhæfir sig í.  Áherslan er lögð á dýpri skilning á hverjum dansstíl og er danskennslan markviss í hverjum tíma.

Valtímar
Markmið valtíma er að auka skilning og getu í tækniæfingum og túlkun. Valtímar eru ætlaðir til þess að auka árangur nemenda og vald þeirra á þeim æfingum sem kennarinn leggur fyrir í danstímum. Áherslur valtíma eru mismunandi í hverri viku þar sem farið verður í tækni nútímadansi, túlkun og tjáningu, einangrun vöðvahópa í commercial dönsum, uppbyggingu í kóreógrafíu og acrobatic (grunnæfingar í fimleikum).

Frístundakort
Ekki er hægt að nýta frístundastyrk upp í námskeiðsverð þar sem námskeið uppfyllir ekki kröfur um lengd námskeiðs til styrkveitingar. Námskeið þarf að vera að minnsta kosti 10 vikur til þess að styrkveiting geti farið fram.